Ordinansa mag-require sa establisimento pagbutang og CCTV, gisugdan na sa committee hearing

Davao City – Gikompirma sa Davao City Legal Office nga gisugdan na sa Committee on Peace and Order and Public Safety sa Konseho, ang pag-draft sa ordinansa nga mag-require sa mga establisimento sa syudad sa Davao nga mag-install og Closed Circuit Television (CCTV) Camera.

Matod ni Davao City Legal Officer Atty. Eleazar Gagula, niadtong pang Pebrero ning tuiga naka- pahigayon og Committee Hearing si Davao City District Councilor Luna Acosta, chairperson sa Committee on Peace and Order and Public Safety kabahin sa pandayon nga ordinansa nga mag- obliga sa mga balay patigayon nga magtaod og kaugalingong CCTV Camera.

Giingon ni Attorney Gagula, hinoon ang sunod nga committee hearing sa Oktubre ning tuiga, aron timbawason og hisgut ang maong ordinansa, kauban sa mga Law Enforcement Agencies ug sa mga negosyante sa komitiba ni Acosta.

Gipasabot ni Attorney Gagula, ang pagmugna sa maong ordinansa subay kini sa pagsunod sa section 16 sa Republic Act 7160.

Gisuwayan og tawag sa DXDC RMN Davao si Councilor Acosta, apan wala nitubag ingon man sa text message nga gipadala ngadto kaniya aron sayrun ang dugang katikaran sa mugnaong ordinansa.

RadyoMaN Joel Viray