Davao City – Nunot sa pagkalangay sa liboan ka mga pasahero tungod sa pagbabag sa national highway sa Lasang sa mga sakop sa Kilusang Mayo Uno sa miaging mga adlaw, kasamtangang giduso karon sa hawanan sa konseho ning siyudad ang usa ka ordinansa nga hugot na magdili sa pagbabag sa mga national highways.
Buot sa Committee on Peace and Order Chairman nga si 1st District Councilor Mabel Acosta nga did-an na ang mga behikulo, pagpamaligya, pagbutang og barikada ug mga rallies nga mag-ukopar sa mga national highways sa dakbayan sa Dabaw.
Ang ordinansa hugtanong magpahamtang og multa nga mukantidad og singko mil ka pesos ug dili ba kaha mapreso dili muubos sa unom ka bulan ang bisan kinsang mga indibidwal nga makasupak sa nasangpit nga balaudnong lokal.
Ang mga lugar nga dili pwede ukopahon subay sa nasangpit nga ordinansa mao ang Panacan Bridge, junction sa Davao-Agusan National Highways ug Carlos P.Garcia National Highways.
Apan kung si Vice Mayor Bernie Al-ag pasultihon, dili lang sa nasangpit nga mga dapit i-aplikar ang ordinansa inay sa tibuok dakbayan sanglit ang tumong man niini mao ang pagsulbad sa kahuot sa trapiko sa siyudad.
Hinoon gitin-aw sa Bise Mayor nga wala giwad-an og kagawasan ang mga militante nga makapasibaw sa ilang mulo sa kagamhanan apan dili lang sa mga magbabalaod nga subli mahitabo ang pag-ukopar sa KMU sa highway sa Lasang.
Gibatbat pa sa opisyal nga nagbahasa sa reklamo ang iyang buhatan gikan sa mga Dabawenyo nga nahasol sa gibuhat sa mga sakop sa Kilusang Mayo Uno human ilang gibabagan ang dalan sama sa ilang gihimo sa Panacan sa miaging tuig.
Samtang gipalanog sab ni Councilor Bonifacio Militar ang iyang punto nga ang pagpanday sa naasoy nga ordinansa dili aron i-ban ang mga militante sa paglusad og lihok protesta apan pag-regulate lang kanila.
RadyoMaN Joel Viray
