TACLOBAN CITY – Kun han una natawag nga Drug Capital han Eastern Visayas an Ormoc City, Leyte, yana igdedeklara ini nga syahan nga syudad nga Drug-cleared ha rehiyon.
Igin anunsyo ini ni Cleveland Villamor, Provincial officer han Philippine Drug Enforcement Agency o kun PDEA, durante han pagparangal han nabibilin nga 28 nga barangay ha Ormoc nga waray na transaction hin illegal nga droga, mapa user ngan pusher.
82 nga barangay an gindeklara nga drug cleared.
Sumala kan Mayor Richard Gomez nga tatalinguhaon niya nga padayon nga magiging drug-cleared an syudad.
Ginpalingkod daw hiya kumo Mayor han Ormoc han mga tawo para solusyunan an problema han droga.
Base han datos tikang ha City Government han Ormoc, sobra mil na an drug surrenderree ha ira nga aminado daw an mga ini nga nahadlok hira han anti-drug campaign han gobyerno.
Ha State Of the City Address ni Gomez nasiring hiya nga humamubo na an crime rate ha Ormoc.
