Suwatan sa Police Regional Office-7 ang Cebu City Transportation Office (CCTO) kalabot sa plano niini nga sirhan ang dakung bahin sa Osmena Boulevard sa dakbayan sa Sugbu atol sa pagtambong ni Presidente Rodrigo Duterte sa pipila ka mga kalihukan sa syudad karong Lunes , Pebrero 12.
Ang hepe sa PRO-7 nga si Chief Supt. Robert Quenery nipasabot nga kinahanglan nilang i-clear ang Osmena Blvd tungod kay sagad sa mga kalihukan ni Duterte anaa sa maong lugar.
Si Presidente Duterte moduaw sa Vicente Osmena Memorial Medical Center aron motukas sa marker sa “Malasakit Center” ug dayon motambong sa joint command conference sa kapolisan ug militar sa conference room sa PRO-7 headquarters sa Camp Sergio Osmena Sr.
Nipasalig hinoon si Quenery nga mohimo sila ug igong pahibawo pinaagi sa CCTO alang sa pagsira sa pipila ka bahin sa Osmena Boulevard sa Lunes aron magiyahan usab ang mga motorista sa himoong rerouting sa mga sakyanan gikan sa R.R. Landon Street paingon sa uptown area .
