Davao City – Nabalaka si Akbayan Partlist Representative Tom Villarin sa posibleng pagdasa sa mga kabataan nga dili makatungha karong tuiga tungod sa epekto sa Tax Reform for Acceleration and Inclusion Law kun TRAIN Law.
Matud ni Villarin nga posibleng mas mudaghan pa gyod ang dili ka-eskwela karong tuiga ugali paminawon ni Pres. Rodrigo Duterte ang sugyot ni Agriculture Secretary Manny Piñol nga wad-on ang 4Ps.
Bisan paman og adunay pundo ang Department of Education alang sa pagbukas sa klase karong adlawa apan posibleng daghan gihapon ang dili maka-enrol tungod sa epekto sa TRAIN Law.
Sa tan-aw ni Villarin, nagpabilin gihapon ang dugay nang suliran sa kakuwang sa magtutudlo, classroom, mga libro, ug daghan pang uban luyo sa kadako sa pondo nga gitagana sa Department of Education.
Busa kun siya ang pa-istoryahon, dili pa gyod ciento por cientong andam ang DepEd sa pagbukas sa klase karong tuiga gumikan sa kadaghang problema sa mga pampublikong eskwelahan.
Naglikay una ang Akbayan Partlist Representative sa pagkumento kun mag-improbar ba ang kalidad sa edukasyon ubos sa K-to-12 Basic Education System sanglit sayo pa aron muhatag og konklusyon sa mao nga hisgotanan.
Kun aduna may angay pangandaman ang kagamhanan karon gawas sa kalidad sa edukasyon kana mao ang pagsulod sa ‘robotics’ diha sa pagpanarbaho.
Ang ‘robotic work force’ maghatud unya sa pagdagsang sa mga tawong walay trabaho diin grabeng maapektohan mao ang mga nanarbaho sa mga call centers.
RadyoMaN Joel Viray
