Ya chene caliente argument ayer por la tarde na security control point na entrada del Fortaleza del Pilar desfues llama atenccion el publico con cuantos police intern que ta lleva backpack y ta usa bullcap na mismo locaccion.
Uno del mga parokano devoto el que ta man pila ayer tarde na entrada del Fortaleza el con quien ya sita el policia por el kargad del backpack que no fuede este lleva dentro del locaccion mientras ta atende el sagrado misa.
Nuay con el persona permiti rason para desaleja ya lang ele na linya y busca era manera quilaya fuede déjà el su backpack apuera porcausa cay querre le atende el misa. El cosa ya saca atenccion del parokyano amo el en tiempo llegada del cuantos police interns que ya pasa na linya y ya manda entra el ta visya uban diila na mismo locaccion kargando diila mga respective backpacks. Aqui ya ya chene argumento donde el mga deboto ya questiona con el mga interns el implementaccion del policia con el orden ejecutivo que sila ta implementa.
Fuera de este, ya causa tambien cunsumisyon y trapico el presencia del mga vehiculo de govierno que ya parquia na “no parking area” na vicinidad del mismo Fortaleza.
Estos mga vehiculo ya causa trapico na lugar porcausa cay ta ocupa ya estos el un lane del camino na detras del Fortaleza y ta tormenta el losdemas motorista man mani-obra para fuede endereza para na designao parking area na compound del ZSCMST.
Apelo del otoridad para chene el patas implementaccion del mga reglamento que ta impone durante este tiempo del Hermosa Festival para nuay que abla el publico que ta sigui coneste propio. – *Bhong Simbajon/RMN News*
