Ta conduci pa embuscada el otoridad con el cumpaƱero del arestao bomb expert si Benhar Eggeng y Idarus con quien ya fuede cuji del otro noche na un pension house na Barangay Putik.
Asegun con el City Police Director Senior Superintendent Neri Vincent Ignacio, base na revelasyon mismo del suspechao, que chene pa ele cumpaƱero quien conchavao na hacida del bomba, lo mismo el armada de este para fuede utiliza na diila target aqui na ciudad.
Si Ignacio ya abla cay siendo chene pa uban el suspechao, ta pricura pa el su mga operativas loca conestos si taqui pa sila na ciudad para fuede Tambien canila aresta y privini socede el diila mga mal-plano.
Si Eggeng ya admiti cay su mismo tambien cuƱao, que residente de Barangay Recodo amo tambien ya contrata conele arma con el bomba encambio na cantidad de treinta mil de pesos.
Mientras tanto, el bomb squad del policia ya abla tambien cay un alto caliber de bomba el cosa ya pricura produci si Eggeng y su mga uban que fuede lleva grande destroso na diila target y na publico si porjemplo ya fuede realiza el diila mal-plano. ā *Bhong Simbajon/RMN News*
