Maga pulis del Central Police Station na encabesamiento del gefe si Chief Insp. Elmer Solon junto con el PDEA, Airforce Intelligence ya confisca un quilo shabu desde con tres maga persona durante el buy-bust operation na un Satti house na Pilar Street enantes pasada ala una del tarde.
Si Solon ya nombra con el maga suspechao como canda Sadan Alkaris Jailani, 22, ,Rajan Jumaani Sahaw, 26 ambos de Talon-Talon y si Ismael Indalez Nassal, 52 de Mampang.
Asegun na report, ya tene que man mirahan el police undercover y tres maga suspechao donde ya conduci el transaccion del droga.
Sinsaber del maga suspechao, mientras ta man cuento canila el diila parroquiano quien un police undercover, atlia ya alreredor el maga pulis, PDEA y maga Airforce intelligence.
Despues lang man cambiajan el buddle money y el un quilo de shabu, dayun ya pichi canila el maga otordad y ya resulta na diila aresto.
