Mientras pa andada el Presidente Rodrigo Duterte aqui na ciudad particular na Labuan para mira el estado del maga victima del incendio, otro ya tambien quema ya sosede y este vez na Sitio asinan, Kasanyangan.
Serca alas 4 del tarde cuando ya sale sobre-saltao el maga vivientes del lugar despues ya columbra sila con el grande fuego que ta lambe con el maga caserias.
Ya pasa tormento el maga bumbero para afasigua con el incendio despues ni un truck de BFP nuay puede entra na lugar del quema porcausa nohay donde pasa.
El pasada o camino na lugar solamente gente-gente lang puede dale paso particular llegar na maga taytayan.
Distancia el maga truck del bumbero ya para y ya hace lang supun-supun maga hose para puede rega na lugar del ta man quema.
Cada-y-cual del maga afectao residente ya precura salva diila maga galamiton pero mayoria nohay mas cosa ya puede pa salva.
Despues del mas de un hora ya puede siempre controla con el fuego.
El vice alcalde Cesar Ituralde personalmente ya anda na lugar para mira el situacion.
