Davao City – Ang dugoon nga katapusan ni Ozamis City Mayor Reynaldo ‘Aldong’ Parojinog ug 14 ka lain pang mga kakaubanan atol sa sayo sa kaadlawon nga police drug raid makonsidera nga maoy malagmit sangpotan sa mga tawong nagdula sa drogas.
Sa pakighinabi sa programang Straight to the Point, gipadayag ni Prof. Ramon Casiple, executive director sa think tank Institute for Political & Electoral Reforms (IPER) nga subo kini nga kamatuoran nga dinhi matapos ang sugilanon sa usa sa gikaintapang lider sa Kuratong Baleleng sa Northern Mindanao kinsa gitudlo nga responsable sa klase-klaseng krimen sama sa bank van robbery, drugs ug uban pa.
Matud ni Casiple, pruweba lamang kini nga malisud gayud ang kaugmaon nga naghulat niadtong mga tawong nahilambigit sa iligal nga binuhatan.
Hinoon, dugang pa sa political analyst, mas maayong ilusad ang usa ka halapad ug makuting imbestigasyon sa independiyenteng hut-ong haron hingpit masayran kun may nalapas ba nga katungod sa mga napatay ug kun aduna bay inosenteng nadalahig kun nadamay sa dugoon nga panghitabo.
Una niini, gipasalig ni Philippine National Police (PNP) spokesperson Chief Superintendent Dionardo Carlos nga adunay himoong ‘motu propio’ investigation sanglit parte kini sa gitawag sa kapulisan nga Standard Operating Procedure (SOP) human sa ilang mga operations ilabi na kun adunay gikatahong makabsan sa kinabuhi kun casualties.
Usab gisulti sa legal officer sa Ozamis City nga buot sa pamilyang Parojinog nga ilusad ang halawum nga imbestigasyon gumikan sa pipila ka mga duda sama sa pangutana nganong pulos head shot man ang nasinatian sa 15 ka mga napatay, nganong giputol sa mga tinugyanan sa balaud ang CCTV camera sulod sa panimalay sa mga na-neutralisa ug ang timing kun oras sa pag-serve sa search warrants.
Usa sa mga ni-kwestion sa oras mao si minority Sen. Franklin Drilon kinsa nangutana nganong sa mga kasong pag-serve sa mga orden sa korte sa duruha ka mga subject nga sila si Parojinog ug una niini si Albuera Leyte Mayor Rolando Espinosa, Jr. pulos kini sila napatay.
Pikas bahin, gibutyag usab ni Sen. Panfilo Lacson, chairman sa Senate Committee on Public Order and Dangerous Drugs kinsa nahimo nga usaka hepe kanhi sa nasudnong kapulisan nga lahi ra ang sitwasyon sa Ozamis sanglit anaa sa gawas ug armado ang mga Parojinog niadtong tungora ug may igong katakos nga makig-atbang ug makigpinusilay sa mga awtoridad hinungdan sa kritikal nga klase sa operasyon nga ilang gilusad.
Kasamang June Duterte
