Kalibo, Aklan— Nagapanagison nga nagdangop sa Kalibo Police Station si Mrs. Arlyn Olbidincha Cabugatan tumandok it Davao ag presente nga residente it Sitio Tapo-tapo New Buswang Kalibo matapos maduea ro P 2.7 Million nga tinipon.
Ginapatihan it nasambit nga babaye nga ginbuoe raya it andang boy nga si certain Jerryl Nabor, 26-anyos it banwa it Madalag.
Suno kana nga napan-uhan nanda kaina it alas 4:00 it aga-aga sa andang pagbugtaw nga owa eon ro kwarta nga ginbutang sa Dura Box.
Gindugang pa it babaye nga kapin sa 13 anyos eon ro suspek sa andang baeay ag ginakabig eon nanda nga dugalingon nga unga bangud masaligan man raya sa sueod it baeay.
Gintinguhaan pa nga ma-contact it biktima ro eaeaki apang owa raya naga sabat sa anang tawag.
Ginapatihan it tagreklamo nga nagakaila raya sa andang 16 anyos nga adopted.
Sa pihak nga parte, haum gihapon nga pasensyahon it biktima ro suspek enkaso nga igabalik kara ro naduea nga kwarta.
Nasayuran nga gintipunan it may pilang dag-on it biktima ro kwarta halin sa andang negosyo ag sa binaligya nga eugta para kunta sa pagtukod it andang baeay.
Insigida man nga naaresto ro suspek sa ginpatigayon nga hot pursuit operation it gintingub nga pwersa it Kalibo PNP ag Malay Police station sa Catiklan Jetty Port.
Maga-paeagiw kunta paadtu it Manila ro suspek kung siin nabuhinan kara ro kwarta para sa pamasahe sa barko.
#TatakRMN
