Davao City- Nabulabog ang kalingawan sulod sa beach resort sa Barangay Pindasan, Mabini, Davao de Oro niadtong Sabado, November 6, 2021, alas-9:15 sa gabie atol sa gilusad nga buy-bust operation sa pagpanguna sa Philippine Drug Enforcement Agency Regional Office XI uban ang National Bureau of Investigation SEMRO ug Mabini Municipal Police Station.
Sa report, anaa sa kapin kun kulang P1.5 million nga party drugs, shabu ug marijuana ang nasakmit sa mga operatiba ug sikop ang 17 ka mga giingong drug personalities sulod sa maong resort.
Malampusong naaresto sa mga operatiba ang target sa drug buy-bust operation nga si Revsan Ethelbert Papay Elizalde, 33 anyos ug residente sa Catalunan Pequeño, Davao City human kini mapalita’g usa ka sachet nga adunay sulud nga violet capsule nga gituohang party drugs nga nagkantidad sa P2,000 ug marijuana nga nagkantidad og P6,000 sa PDEA Agent nga nagsilbing poseur buyer.
Arestado usab atol sa maong operasyon, ang mga kaubanan sa suspek nga giila sa PDEA XI nga sila Eana Faye Marie Olea, Bryk Jiordan Archival, Kurk Bryan Tiubot, Paolo Guerero, laing (12) pa ka mga indibidwal nga sila Jomark Aping, Ariel Bueno, Edel Caballero, Ronald Chuan, Fritz Dinopol, Tom Jhun Doblas, Mark Christopher Isip, Janlord Masong, Christopher Prudente, Jesus Ragas III, Giovanni Tabanao ug Jason Viduya ang naaktuhang nag- drug session.
Nakuha sa mga awtoridad ang 722 suspected party drug tablets o capsules nga adunay street value nga P 1,227,400, 9 ka plastic bottles nga adunay sulod nga suspected liquid party drugs nga nagkantidad og P 15,000, P17,000 o 2 vials sa suspected liquid party drugs, 200 grams nga marijuana o mobalor ngadto sa P150, 000, 26 ka mga dried marijuana leaves nga anaa sa 200 grams o mukantidad og Php. 24,000, 10 grams sa shabu o anaa sa P150,000 ang street value, 77 ka mga LSD nga mukantidad sa Php. 130,000 ug 7 ka mga botelya sa energy drinks.
Ang mga suspek kasamtangang naka-detain sa National Bureau of Investigation detention facility ug kasuhan sa Republic Act 9165 otherwise known as the Comprehensive Dangerous Drugs Act of 2002.
Gisumite na ngadto sa PDEA Regional Office Laboratory nag mga nasakmit nga mga droga par sa examination.
RadyoMaN Aimee Guinita
