Davao City- Gibana-banaang mokabat sa 1.6 billion pesos ang damyos sa nahitabong sunog sa NCCC Mall Davao nga miulbo kaniadtong adlawng Sabado.
Kini ang giingon ni F/Supt. Honey Fritz Alagano, Davao City Fire Marshal atol sa gipahigayong AFP-PNP Presscon.
Dugang segun ni Alagano nga nagsugod usab ang sunog sa 3rd floor furniture area apan dili pa masuta og unsay hinungdan sa sunog.
Aron mapadayon ang imbestigasyon sa maong sunog, gi-endorso sa Bureau of Fire Protection kun BFP-Davao ngadto sa National Headquarters ang maong insidente tungod sa kadako sa damyos ug sa kadaghan sa casualties.
Sumala ni Alagano, dunay limitasyon ang Davao City Fire aron maghimo og imbestigasyon hinungdan nga gimugna ang inter-agency taskforce nga pangunahan sa Department of the Interior and Local Government (DILG) kauban ang BFP, Department of Justice (DOJ), National Bureau of Investigation ug Criminal Investigation and Detection Group (CIDG) Davao diin gilaumang muabot karong semanaha ang maong taskforce aron makasugod sa imbestigasyon.
Sa karon, temporaryong giundang ang search and retrieval operations tungod unstable ang building ug wala pay schedule kung kanus-a nila ibalik ang maong operasyon gani sigun ni Alagano nga makigkoordinar pa usab sila sa building official kung i-demolish ba o dili ang NCCC Mall Davao.
Karong adlawa, adunay buhaton nga dayalogo kauban ang kabanay sa mga biktima, NCCC ug SSI management, local chief executive ug BFP.
RadyoMaN Renz Barbarona
