Davao City – Mukabat sa P1.6M ang damyos sa nahitabong sunog sa Inawayan, Toril, Davao City pasado alas-2 kagahapon sa hapon (Abril 20, 2021).
Sa interbyu sa DXDC RMN Davao kang Senior Fire Office (SFO) 1 Cheric Dalupere, ang fire investigator sa Toril Bureau of Fire Protection (BFP), gibutyag niini nga matud sa anak sa tag-iya nga si John Gerald Guevarra, unom (6) ka balay ang nasunog diin gawas sa ilang mismong pinuy-anan, nasunog usab ang lima (5) ka boarding house nga ilaha usab nga gipanag-iyahan.
Segun ni Dalupere, padayon pang ginasuta ang hinungan sa sunog apan matud sa tagtungod, sa kusina ang source of origin kun nagsugod ang kalayo ayha miulbo ang sunog.
“Matud pa sa interbyu kang Mrs. Guevarra, nagluto daw sila og karne unya nitalsik daw ang mura’g oil or taba sa karne, niabot daw didto sa hose sa LPG, hose line, pero so far atoa pa na siyang imbestigahan,” saysay sa investigator.
Alas-3 sa hapon sa dihang nagdeklara og fire under control samtang alas-3:48pm sa dihang nagdeklara og fire out ang kabomberohan.
Walay natalang casualty o injured sa insidente, samtang, na-turn over usab sa tag-iya ang narekober sa BFP nga kwarta ug alahas gikan sa naugdaw nga balay.
RadyoMaN Kirby Manzon
