P10,000 NA FINANCIAL ASSISTANCE TAGTUNOL NAN GOBYERNO SA SURIGAO DEL NORTE NGADTO SA PAMILYA NAN DUHA KA PULIS NA TAGDAGIT

171

P10,000 NA FINANCIAL ASSISTANCE TAGTUNOL NAN GOBYERNO SA SURIGAO DEL NORTE NGADTO SA PAMILYA NAN DUHA KA PULIS NA TAGDAGIT
Moabot sa P10,000 na Financial Assistance an tagtunol nan gobyerno nan Surigao del Norte ngadto sa pamilya nan duha ka pulis na tagdagit didto sa Bad-as,Placer.
Namahayag si Vice Gov. Arturo Carlos Egay Jr., sa ngayan ni Gov. Sol Matugas unta makatabang an amo na kantidad ngadto sa ila ni Rouella Doverte, an asawa ni P02 John Paul Mondaya Doverte lakip si Alfredo Degamon Sr., an amahan ni P02 Alfredo Lauro Degamon Jr. Bisan paman sa problema na nasinati sa pagdagit sa duha ka pulis unta sa labing dali na panahon maresolba na ini.
Isa ka panagtigom na an tagpahigayon kahapon nan mga naglangkob sa Municipal ug Prov’l. Crisis Management Committee ug may mga inisyal na lakang na taghimo kalabot sa sitwasyon. Namahayag si Atty. Premolito Plaza, an Prov’l Administrator ug isa sa mga miyembro sa Committee na tagpili nila si Father Mario Espano isip isa sa mga negosyador kaiban an pipila ka mga Pastor ug iban pa. Tag-angkon pa niini na sugod adton milabay na tuig, ikalima na an insidente an pagdagit sa duha ka pulis gikan sa Placer.
Kuman adlawa, tagtakda isab na magtigom an Executive Committee sa Prov’l Peace and Order Council para sa diskusyon sa uno na paagi na makatabang an mga Mayores sa Intelligence Operations gamit an Intel Fund ug iban pa na aksiyon. Nanawagan isab si Atty. Plaza na unta mapadali an pagbuhi sa duha ka pulis sa malinawong paagi.

Facebook Comments