P12k nga ara sa kahita nga nabilin sa taxi nabalik na sa bata sang tag-iya paagi sa dyHB

24

BACOLOD CITY – (UPDATE) Dalayawon ang ginhimo sang isa ka taxi driver nga pag uli sang isa ka wallet nga nabilin sa iya salakyan sang iya pasahero nga may unod masobra P12 mil pesos.

Si Angiegar Castellano, 48 anyos, residente sang Purok Greenfield, Brgy. Tangub, Bacolod City, driver sang Miracle Taxi ang nagpadulong personal sa istasyon sang DYHB RMN Bacolod agud iturn-over ang wallet nga kolor itom nga nagabilin sang iya pasahero.


Ang wallet, base sa ID nga yara sa sulod ang iya ni Charie Franco, pumuluyo sang banwa sang Pulupandan.

Suno kay Manong Angiegar nga may mga las 2 sini gid hapon, ang amo nga pasahero ang nagsakay sa iya halin sa atubang sang Regional Hospital kag nagpanaug sa San Sebastian.

Pahayag sang driver nga ulihi na niya natalupangdan ang amo nga wallet kag sang iya ginlantaw, ini ang may unod nga kwarta nga cash nga nagdangat sa masobra P12 mil pesos subong man mga importante nga ID.

Angut sini, gilayon nga nagpangita sang contact ang DYHB para makapakig-angut sa tag-iya sang wallet kag didto na contact ang iya bata nga si Danielle Iana Manalo.

Gilayon nga nagpadulong sa istasyon sang DYHB ang bata agud i-claim ang wallet kag mapasalamatan ang honest nga taxi driver.

Ginpahayag ni Danielle nga nagkadto gali sa Regional Hospital ang iya iloy agud magpa schedule sang CT Scan para sa iya nga lolo kag ang kwarta nga unod sang wallet amo pa dapat ang gamiton para diri.

Siling sang bata nga nabal-an gid lamang sang iya iloy nga wala na ang iya wallet sang ini ang mabayad na kuntani sa iya ginbakal sa Lopue’s.

Nakatigayon nga makapauli si Charie sa Pulupandan bangud may nabilin pa ini nga P50 pesos sa iya bulsa kag sa iya pag-abot sa balay didto na niya ginpabalo sa iya bata ang natabo.

Nagpahayag sang daku nga pasalamat ang bata sang pasahero bangud sa katampad sang driver kon diin iya ginsiling nga ilisipon na lamang ang mga tawo nga kaangay ni Manong Angiegar.

Si Angiegar Castellano ang kasado kag may duha ka mga kabataan nga lunsay mga babayi./DYHB NEWSROOM

Facebook Comments

From Advertisers