Davao City – Anaa sa P148-M ang nahimong damyos atol sa pag-igo sa El Niño weather phenomenon dinhi sa Davao region base sa Damage Assessment Report sa Department of Agriculture gikan Enero hangtod Marso ning tuiga.
Sumala ni Roy Jose Pascua, focal person for Disaster Management sa Department of Agriculture 11 (DA-XI), pinaka dakong apektado ang Davao del Sur partikular sa lima ka mga munisipalidad: Bansalan, Matan-ao, Hagonoy, Quiblawan, ug Magsaysay diin sa pagkakaron nagpadayon og taas ang maong damyos.
Saysay ni Pascua nga dakong naapektuhan ang 45 hectares nga major production areas sa maong probinsya diin sagad nadaot ang rice crops ug maisan.
Samtang gipaniguro usab sa maong DA-XI focal person nga naka standby na ang mga posibleng interventions sa gobyerno sama sa mga water pumps, alternative crops nga mabuhi sa tinghulaw, ingon man ang pag kunsidera sa cloud seeding aron maluwas ang mga pananum sa mga mag-uuma.
Gikanayon ni Pascua nga P90-M ang ilang gipangayo nga pondo alang sa rehabilitasyon sa agrikultura sa Rehiyon 11 diin sa pagkakaron P30-M pa lang ang na-download sa DA-XI.
Kahinumdoman nga nag deklara na og ‘state of calamity’ sa Davao del Sur gumikan sa huwaw niadtong adlaw’ng Miyerkules, Marso 20, 2019.
Sa pikas bahin balik na sa white alert ang kanhi blue alert sa status dinhi sa Davao Region sumala sa Office of the Civil Defense 11 (OCD-XI).
Kini human wala nay namonitor nga Low Pressure Area (LPA) sulod sa Philippine Area of Responsibility (PAR).
RadyoMaN Jason Amisola
