Davao City – Laing drug den na usab ang na-dismantled alas- 9:45 kagabie sa Philippine Drug Enforcement Agency XI sa may Exodus, Father Selga Street, Davao City.
Matud ni Philippine Drug Enforcement Agency XI Assistant Regional Director Atty. Behn Tesiorna nga nakasuhan na karong adlawa ang lima ka mga suspek nga sila Alvin Torrefiel, tig mintinar sa Drug Den nga si Eric Talorin ug mga drug users nga sila Eric Cafe, Eric John Amahan ug Mark Anthony Quindao.
“Wala na ta nasurpresa niini nga naay drug den kay diri sa Davao daghang mga drug den diri ang problema lisod lang kaayo sakpon tungod kay layo pa lang ka sunog naka pasabot layo pa lang ka daghan ng maka-inform sa ilaha nga naay paingon didto nga otoridad mu-scamper na sila dayon pag-abot namo didto wala nay maabtan kini sila kumpyansa kaayo kay ang Fr. Selga di man kaayo ni sudlunon so na-timingan gyod sila,” matud ni Tesiorna.
Nadakpan sa PDEA XI ang target sa buybust nga si Torrefiel human kini mapalitan sa asset sa PDEA og P14,000 kantidad sa shabu.
Naabtan pa usab sa mga operatiba nga gasuyop og droga ang laing mga suspek.
Sulod sa maong drug den nakarekober sa PDEA ang anaa sa 12 gramos o mokantidad sa P180,000 nga shabu ug mga drug paraphernalias.
Human sa inquest proceeding sa piskalya kaganiha gidala na og balik ang lima ka mga suspek sa detention facility sa PDEA XI.
RadyoMaN Aimee Guinita
