Di pa mahatag sa kagamhanan sa dakbayan sa Lapulapu ang gisaad niini nga reward money alang sa pagsulbad sa kamatayon ni Christine Lee Silawan karon nga aduna nay napasakaan ug kaso ngadto sa piskaliya .
Si Lapulapu City Mayor Paz Radaza nipasabot nga makig-alayon kini sa National Bureau uf Investigation ingon man sa kapolisan alang sa posibling rekomendasyon niini kung kinsa ang angay nga matagaan sa maong ganti .
Gipasabot ni Radaza nga paabuton una nila nga makompleto sa NBI-7 ang imbistigasyon sa krimen ilabi na kay posibling adunay laing mga kauban ang 17 anyos nga suspek nga nadakpan ug nag-atubang na ug kasong murder .
Matud ni Radaza ang reward ihatag sa syudad kung makompleto na ang kasulbaran sa krimen , ug ang makadawat niini mahimong ahensiya sa gobyerno o kaha mga indibiduwal nga nakatabang sa kasulbaran sa krimen .
Ang P1 milyon nga ganti kuhaon sa syudad gikan sa “award and reward” account sa dakbayan .
