Davao City – Aprubado na sa hawanan sa konseho ang dos milyones ka pesos nga ayudang pinansiyal alang sa mga biktima sa landslide kung asa 60 ang namatay didto sa Naga City, Cebu.
Ang naasoy nga asistensiya, gamiton alang sa pagpalit og pagkaon ug mga gamit kung sa diin ang pundo gikuha gikan sa lima ka porsyento sa Quick Response Fund 2018 sa lokal nga kagamhanan sa syudad.
Matud ni 2nd District Councilor Danilo Dayanghirang kinsa chairman sa finance, ways and means committee nga mismo si Mayor Inday Sara Duterte-Carpio ang mihangyo sa konseho nga mag-alokar sa mao nga kantidad aron itabang sa mga biktima sa trahedya sa Naga.
Dili pa lang dugay dihang naghatag og kapin 20 milyones ka pesos ang lokal nga kagamahan sa mga lugar sa Luzon area nga naigo sa Bagyong Ompong.
Dugang ni Dayanghirang nga sukad mi-entra ang tuig 2018 ang kagamhanang lokal nakapagawas na og 50 milyones ka pesos nga pundo gikan sa Quick Response Fund alang sa pagkaon ug pinansiyal nga ayuda sa mga nabiktima sa kalamidad sa nasud.
Ning kasamtangan, ang dakbayan sa Dabaw nabinlan pa og 100 milyones ka pesos nga pwede magamit ugali maigo sa kalamidad ang syudad.
RadyoMaN Joel Viray
