Davao City – Nagtanyag karon og muabot sa P200k nga ‘reward money’ ang lokal nga gobyerno sa Davao del Sur aron mapadali ang pagsikop sa suspek sa pagpusil sa district Engineer sa Department of Public Works and Highways (DPWH) sa Lapu-Lapu, Digos City, Davao del Sur.
Gibutyag ni Davao del Sur Vice Governor Marc Cagas nga P50-mil ang ihatag sa makatudlo sa suspetsado, P50-mil sa makatudlo sa mastermind samtang P100-mil alang sa mga sakop sa kapulisan nga makasulbad sa maong kaso.
Una nang gibutyag sa DXDC RMN Davao ni Police Lieutenant Colonel Anthony Tababa, officer-in-charge sa Digos City Police Station nga aduna na silay person of interest sa pagpusil kang Engr. Nicomedes Parilla niadtong adlawng Lunes nga anaa na karon sa luwas nga kahimtang.
Gibutyag niini nga nakig-alayon kanila ang nakakita sa insidente diin nakabuhat na usab sila og sketch nga maoy basehan sa pag-ila sa posibleng responsable sa krimen.
Mipagula usab og mga numbero ang kapulisan sa publiko kung asa nila mamahimong i-report ang ilang kasayuran sa insidente, sa 0998-967-4146 ug 0998-967-4148.
RadyoMaN Kirby Manzon
