Davao City – Giplanuhan karon sa konseho nga himoong mas sayo ug sugdan na sa bulan sa Agosto ang pagpatuman sa 45 ka mga Point to Point (P2P) bus system dinhi sa syudad sa Davao.
Sa nahitabong panagpulong sa City Transport and Traffic Management Board (CTTMB) kaniadtong Hulyo 26, gibutyag ni Davao City Councilor Conrado Baluran nga naaprubahan na nila ang draft sa maong ordinansa sa ilang lebel alang sa deliberasyon sa lokal nga konseho.
Sulod sa maong draft ang unom ka mga ruta sa maong P2P bus system:
1. Mall to mall: SM City agig McArthur Highway, Boulevard, Gmall, Victoria Plaza, Abreeza hangtod SM Lanang ug vice versa.
2. Catalunan Grande: Catalunan Grande Brgy. Hall, CP Garcia, Diversion Road, Phoenix Maa, S&R, Petron balik sa Catalunan Grande
3. Mintal: Sto. Niño dretso Ulas, McArthur Higway, SM City, SP Building, San Pedro St. agig NCCC mall-Maa, Bypass road pabalik Tugbok
4. Cabantian: Cabantian-Mamay road, SM Lanang, Cabaguio, underpass Agdao, Dacudao, JP Laurel, SM Lanang pabalik Mamay-Cabantian road
5. Toril:Toril district hall, McArthur Highway, Matina Aplaya, SM City, Ateneo(Roxas), Quirino pabalik Toril
6. CP Garcia: By pass route, Diversion, Panacan nga mohunong sa Maa, El Rio, Buhangin, Milan, NHA ug Airport
Sumala ni Baluran nga aduna lamang 15 ka minutos ang interval sa mga bus una mubyahe ug matag 30 ka segundos nga maghulat sa matag bus stops.
Giklaro sa konsehal nga dili maapektuhan ang mga PUJ drivers niini gumikan gidili ang pag pick up sa mga pasahero nga maagian lang sa dalan ug wala sa bus stops.
Gitataw niini nga adunay kamahalan ang pamasahe niini apan gipaneguro nga komportable ang mga mubyahe niini.
Dugang ni Baluran nga ang 10-meter buses nga adunay 40-50 ka tao ang kapasidad anaa na karon sa kaulohan ug ginahulat na lamang ang diskresyon sa lokal nga panggamhanan gani ila na kining ginapaspasan.
Samtang karong semanaha magpahigayon ang komitiba sa Transportation and Communication og committee hearing alang sa pinalisasyon sa maong planong ordinansa.
RadyoMaN Jason Amisola
