TACLOBAN CITY – Yana nga bulan han hunyo in mahitaas na an minimum wage han mga nagtatrabaho ha pribado nga sector dinhi ha Sinirangan Bisayas.
Ini in matapos aprobahan han Regional Tripartite Wages And Productivity Board (RTWPB) an new wage order ha rehiyon.
Ha interview han RMN kan DOLE Regional Director Cyril Ticao, 20 pesos an ginhitaas para ha mga non-agricultural sector ngan 30 pesos naman para ha mga retail services.
Tikang ha 285 pesos nga minimim daily pay, magigin 305 pesos na an adlaw para han mga magtatrabaho ha non-agricultural sector.
Tikang naman ha 275 pesos nga minimum wage daily pay an mga magtatrabaho nga aada ha retail services in igtutupong na ini ha non-agricultural sector, magigin 305 pesos na liwat.
Pero ini nga Wage Order No. 20 nga gin-aprobaran HAN RTWPB in rereviewhon pa han National Wages And Productivity Commission (NWPC)
Dugang han opisyal, posible ini maaprobaran yana nga mayo ngan maepekto ini yana nga Hunyo.
Para naman ha farming sector, 24 pesos an ginhitaas han minimum wage, 269 pesos na para ha sugar farm workers ngan 275 pesos na para ha non-sugar plantation workers.
Ini ba nga kadugangan nga 20 pesos in sadang na para ha mga magtatrabaho nga yana in naaapektuhan han Tax Reform For Acceleration And Inclusion (TRAIN) Law?
Sumala han DOLE, ini nga bag-o nga minimum wage adjustment in ginpagdesisyunan han han magkadurudilain nga ahensya han gobyerno ngan pira nga pribado nga sector.
