TACLOBAN CITY – Tim-os na nga ipapatuman ha Hunyo 25, 2018 adlaw han lunes an pinaka bag-o nga minimum wage ha Eastern Visayas.
P305.00 na an bag-o nga minimum wage para ha non-agricultural, sugar mill, ngan retail/service nga may 11-30 nga magtatrabaho o employees.
P275.00 naman ha cottage/handicraft, retail/service nga may 10 paubos nga mga magtatrabaho, ngan ha agricultural non-sugar ngan sugar farm.
Sumala kan Engr. Cyrilo Ticao, Regional Director han Department Of Labor and Employment Region 8, kinahanglan ipatuman ngan sumunod an mga employers ha minimum wage adjustment tinikangan ha Hunyo 25, kay kun diri, mag-aatubang hin sirot an mga kompanya.
Dugang pa han opisyal, maglilibot an mga labor inspector ha bug-os nga Rehiyon 8 ha mga kompanya kun hira ba in nagpapatuman ngan nasunod ha bag-o nga minimum wage.
Gin-aaghat naman han opisyal an mga empleyado nga magsumat ngan pumakadto mismo ha buhatan han DOLE kun diri pa napapatuman ha iya gintatrabahuan an bag-o nga wage order.
