Davao City – Gikatakdang ihatod ngadto sa probinsya sa Albay ang P4.5M financial aid gikan sa dakbayan sa Davao alang ngadto sa mga biktima sa pagalburuto sa bulkang Mayon.
Atol sa regular session sa lokal nga konseho gitugutan si Davao City Mayor Sara Duterte-Carpio nga gamiton ang parte sa pondo sa calamity fund sa dakbayan.
Segun ni City Disaster Risk Reduction and Management Office head Emmanuel Jaldon, ang maong ayuda para sa siyam ka mga lungsod sa Albay nga mao ang Camalig, Daraga, Guinobatan, Ligao, Malilipot,Tabaco, Sto Domingo, Legazpi ug Bacacay.
“Para ito sa mga na-displaced na mga tao na nakaapekto sa livelihood nila na most of them nasa mga evacuation centers, daghan sila’g mga gikinahanglan didto sama sa mga pagkaon, shelter, ang uban nagkasakit . . . itong financial aid will serve that purpose,” sumala ni Jaldon.
Ang mga nasangpit nga mga lugar makadawat og P500,000 kada usa.
Mokabat sa dul-an 80 mil ka mga indibidwal o kapin 20 mil ka mga pamilya ang mga apektado nga nagpabilin pa sa mga evacuation sites.
RadyoMaN Aimee Guinita
