EASTERN SAMAR – May mga narekober na liwat an mga otoridad nga gin-aaligar cocaine ha Eastern Samar.
Sumala han PNP Region 8, nakit-an ni Jerome Balbuena, usa nga caretaker han white sand beach han Barangay Sulangan, Eastern Samar an 4 bricks nga gin-aaligar cocaine nga nakabrown packaging dida han April 14, Sabado.
Dida la han nakalabay nga lunes ini nai-report ha mga otoridad ni Balbuena.
Ha pag-inspeksyon han mga kapulisan han Guiuan PNP, pulbos an sulod han brown packaging nga dayon naman ini iginkadto ha Regional Crime Laboratory para han chemical examination.
Ha nagawas nga initial screening nga ginbuhat han Forensic Chemical Officer (FOCO), nagpositibo ini nga cocaine man gud ini nga pulbos.
May kabug-at an nasabi nga pulbos nga 5 ka-kilo nga nagkakantidad P4,000,000.00
Ini nga kontrabando in ipapailarom pa ha confirmatory examination sumala han PNP Region 8.
Nag-abiso na hi PCSupt. Gilberto Cruz ha ngatanan nga PNP Stations ha bug-os nga Region 8 nga igpadayon an monitoring ha ira mga lugar kun mayada mga kontrabando nga marerekober tikang ha kadagatan.
Abiso naman ni Cruz ha publiko nga igpasabot dayon ha mga kapulisan kun mayada nakit-an nga pulbos nga butang tikang ha kabaybayunan.
