P5.1M nga shabu nakuha sa isa ka barbero

722

BACOLOD CITY – Iga inquest gid sini nga adlaw ang kaso nga violation sang Republic Act 9165 batuk sa nadakpan nga suspek nga nakuhaan sang kapin P5.1 million pesos nga balor sang suspected shabu sa buybust nga ginpatigayon mga las 7 kagab-i sa Purok kabulakan, Brgy. Singcang Airport, Bacolod City.

Ang suspek nga nadakpan nakilala kay Errol Gimarangan Jr., 28 anyos ang edad, single kag pumuluyo sang Purok Gaisano, Brgy. Alijis, Bacolod City. Si Errol ang isa ka barbero.

Ginpatigayon ang amo nga buybust sang Police Station 8 sang BCPO sa pagpanguna sang station commander sini nga si PCI Ruel Culanag.

Suno kay Culanag sa interview sang DYHB, wala sila nag expect nga amo sini ka daku sang suspected shabu ang ila ma recover sa possession sang suspek kon diin nagabug-at ini sang 430 grams kag may estimated market value nga P5.1 million pesos.

Ang suspek ang ginakabig “ newly identified drug personality kag high value target “ kag detained na karon sa custodial facility sang Police Station 8.

Dismayado ang punong barangay sang Sincang-Airport nga si Rosinie Distrito angot sa asud-asod nga drug raid sa iya barangay sa diin dalagku nga balor sang illegal nga droga ang na-recover.

Paathag ni Distrito nga lunsay mga pangayaw ang mga drug suspects kag temporaryo lang nga naga-istar sa ila barangay.

Ginpasalamatan naman ni Distrito ang kapulisan sa madinalag-on nga drug operation sa sulod na sang duwa ka adlaw.

Nagpasalig man ang kapitan nga iya pagbaskugon ang iya nga Barangay Drug Abuse Council ukon BADAC./dyHB BACOLOD

Facebook Comments