P5.3 balor shabu ya confisca

Maga pulis ya encabesa si Supt. Edilberto Alvarez ya puede confisca shabu balor de 5 million de peso desde con un man maridable durante el buy-bust operation na un apartment na Estrada Street, Tetuan del Lunes por la noche.
Alas 8 del noche cuando ya conduci el maga pulis con el buy-bust operation na Lakibul Apartment ya resulta na aresto del man maridable con quien ya conose como canda Nidzma Juaini y Sapinding, 32 y su marido si Alyaser Juaini y Halahim, alias Al, 33, ambos maga native de Jolo, Sulu.
Durante el buy-bust, maga pulis ya recobri desde canila maga shabu tiene el balor de P1.3milliones y P500 marked money.
Pero ayer mediodia el maga pulis ya bira otravez na apartment y ya encontra 12 maga grande paquete de shabu tiene el estimao cantidad de P4milliones.
Suma total P5.3milliones el shabu ya recobri el maga pulis desde con el man maridable.
Con el maga suspechao ya detene mientras el maga shabu ya entrega dayun na PNP Crime Laboratory mientras maga pulis ta prepara ya el caso que ay planta contra con el man maridable.

Facebook Comments