P50 fare increase, gisinggit sa mga UV drivers

Davao City- Sunod-sunod man ang usbaw sa petrolyo sa nasod ning ulahing mga semana, apan wa’y plano sa karon ang operator ug ang driver nga mag umento sa pletehan sa Utility Vehicle Express (UV Express).

Sumala ni SM VAN Terminal Supervisor Jun Sendrejas nga wala pa-mahisguti sa ilahang organisasyon ang pagduso og petition alang sa usbaw sa pletehan UV Express.

Segun ni Sendrejas nga sunod semana gikatakda ang panagpulong sa ilang organisasyon ug hayan usa sa mga matuki mao ang usbaw sa pletehan.

Giangkon niini nga daghan na sa ilang drivers ug operators nagpaabot og mulo tungod sa wa’y puas nga pagsaka sa presyo sa petrolyo kay niini gamay nalang ang ilang kinitaan gikan sa biyahe.

Busa singgit ni Apolinar Pacquiao sa Kidapawan Southbound Utility Van Transport Cooperative, nga patas-an og P50 ang pamiliti sa mga van passenger aron sa ingon dili sila malugi sa matag biyahe.

Gibutyag ni Sendrejas nga sa miaging tuig kon 2022 pa sila katapusang nagpa – usbaw og P50 nga plete sa mga van passenger hatod gihapon sa oil increase nga rason.

RadyoMaN Joel Viray