Davao City – Subling gibatikos sa Kilusang Magbubukid ng Pilipinas Southern Mindanao Region (KMP-SMR) ang administrasyon ni Pres. Rodrigo Duterte tungod sa pagtunol og 500 pesos nga tabang pinansiyal sa mga trabahante matag bulan.
Gipuna ni KMP-SMR Secretary General Tony Salubre ang kagamhanan ni Pangulong Duterte gumikan kay ang pagsubsidiya og 500 pesos matag bulan sa mga trabahante sama ra kini nga nakaloko kanila.
Gipamugos ni Salubre nga dili tubag sa panginahanglon sa mga trabahante ang dugang ayuda nga 500 pesos nga tabang sa gobyerno matag bulan.
Ang labaw nga gikinahanglan sa mga mamumuo mao ang pagpasaka sa suhulan aron makasustinar sa galastuhanan ang mga trabahante maingon ang pagtuldok sa contractualization kun ‘endo’ alang sa seguridad sa panarbaho.
Alang ni Salubre nga wala gihapoy pulos ang dugang 500 pesos nga subsidy sa gobyerno tungod kay mas magmahal naman pod ang mga nag-unang palaliton tungod sa epekto sa Tax Reform for Acceleration and Inclusion (TRAIN) law.
Gibarugan sa secretary general, ang mas gipangandoy sa mga trabahante aron mahaw-as gikan sa kalisdanan mao ang pagpa-usbaw sa suhulan ug pagwagtang sa ‘endo’ ug dili ang pagtunol og 500 pesos nga cash assistance.
RadyoMaN Joel Viray
