Davao City – Gibana-banaang anaa sa kapin kun kulang 500,000 pesos ang damyos sa sunog sa Purok 4, Pag-asa, Bankerohan ning syudad sa Davao nga nagsugod bandang alas 4 sa hapon kaganina.
Kini ang giingon ni Fire Inspector Esequil Tabon, Chief Operation sa Davao City Fire District atol sa interview sa DXDC RMN Davao kaniya.
Sa maong sunog, 30 ka structures ang naugdaw nga gilangkuban sa 10 ka balay, usa ka boarding house ug 20 ka stalls diin matud pa nagsugod ang kalayo sa usa ka gambalay nga gipanag-iyahan sa giilang si Majed.
Gideklarang fire out sa kabomberohan ang sunog alas 7:02 na sa gabii hinuon walay natalang napagan sa pag-ulbo sa kalayo sa nasangpit nga lugar.
Sa karon ginasuta pa sa mga fire investigators ang hinungdan sa maong sunog.
Padayong pahimangno sa Bureau of Fire Protection kun BFP-Davao nga magmaigmaton sa mga gamit nga posibleng maoy hinungdan sa sunog.
RadyoMaN Renz Barbarona
