P500K WINNER | Lola nga nakadaug nautdan pa sang kuryente, manugbirthday sa Jan. 28

286

BACOLOD CITY – Pagpa-reconnect sang iya na-disconnect nga kuryente ang isa sa una nga himuon sang grand winner sang RMN Big Christmas Promo sa tion nga mabaton na niya nag iya premyo nga P500k pesos.

Si Erlinda Magallanes, 73 anyos ang edad sang Purok San Roque, Phase 6-B, Brgy. Handumanan, Bacolod City amo ang nakasungkit sang grand prize nga kapin 500 mil pesos sa grand draw sang RMN Big Christmas Promo nga ginpatigayon kahapon.

Gin-gamit nga coupon entry ni Nanay Erlinda amo ang Milo sa iya pagpasakup sa Week 2 sang promo kon diin mismo ang Station Manager sang DYHB RMN Bacolod Radyoman Jeony Bigay amo ang naka-gabot sang iya entry.

Suno kay Nanay Erlinda nga daku ang iya pagpasalamat sa iya pagdaug bangud nga madamo ini sang mabulig sa iya pangabuhi, partikular ang pagpatakud balik sang iya na-utod nga kuryente halos apat ka bulan na ang nakaligad.

Ginpahayag sang winner nga gamiton man niya ang iban nga kantidad sa pagpangita sang bisan gamay lang nga negosyo nga iya mapangabuhian sa matag-adlaw nga tanan.

Daku nga bulig man ang gindaug nga P500 mil pesos ni Nanay Erlinda para sa iya bulong nga maintenance sa iya sini high blood pressure.

Para kay Nanay Erlinda isa man ini ka advance nga birthday gift bangud nga magasaulog siya sang iya kaadlawan sa maabot nga January 28.

Ang grand draw sa Bacolod ang gin supervise sang representante sang Food and Drug Administration nga si Mrs. Maricon Dimatulac kag sang Special Project Head sang DYHB RMN Bacolod nga si Radyoman Sol Jolito.

Sa nahibalu-an may kapin sa 2 milyones pesos ang gin panagtag kahapon nga adlaw sa nagkalain lain nga bahin sang Pilipinas para sa RMN Big Christmas Promo.

Kabahin ini sang pagpasalamat sang Radyo Mo Nationwide sa padayon nga suporta sang mga tagpalamati gani padayon man nga nagapanguna ang halos tanan nga estasyon sang RMN sa Pilipinas./dyHB BACOLOD

Facebook Comments