Davao City – Mokabat sa P50M ang kantidad sa asistensiyang iproposar sa City Social Services Development Office kun CSSDO alang sa mga apektado sa nahitabong paglampornas sa baha kagahapong adlawa, Agosto 28, sa syudad sa Davao.
Atol sa nahitabong iSpeak Forum, gibutyag ni Marilyn Agonia, assistant Department head sa CSSDO, nga nalakip na dinhi ang tabang pinansyal, goods and non goods ingon man mga medisina.
Sa pagkakaron padayon ang ilang assessment ngadto sa mga apektadong pamilya.
Base sa ilang inisyal nga assessment sa CSSDO, dunay 3,559 ka mga pamilya ang naapektuhan sa dagkong baha gikan sa Talomo, Los amigos, Tugbok, Wangan, Calinan , ug Catalunan Pequeño.
Gani karong hapon dunay ipahigayong special session ang 19th City Council aron maaprubahan ang pag-endorso sa maong budget pinaagi sa virtue of state of calamity sa upat ka mga barangay partikular ang Tugbok, Talomo, Los Amigos ug Wangan.
Gipasalamatan usab sa CSSDO ug sa lokal nga panggamhanan ang mga pribadong sektor ug volunteers nga mitabang kanila atol sa pag rescue sa mga natrap sa baha kagahapon.
Hinuon walay casualty sa maong insidente apan ginaberipika pa sa CDRRMO ang giingong usa ka pamilyahan nga gilangkuban sa lima ka membro kinsa matud pa nalunod sa Tugbok area.
RadyoMaN Jason Amisola
