Gihangyo ni Mayor Roberto G. Uy, Jr. sa lungsod sa Liloy ang mga lumulupyo nga ma-apektahan sa umaabot nga proyekto sa Conditional Matching Grant to Provinces (CMGP) nga mosuporta ug dili magmakuli sa pagdonar ug porsiyon sa ilang luna alang sa nasangpit nga proyekto.
Kini mao ang iyang gipamulong atol sa gipahigayon nga Barangay Consultation sa Brgy. Punta lungsod sa Liloy sa nakalabay nga semana diin ang kagamhanang probinsiyal ang nipatawag sa mga affected persons aron masayran nila ang mga guidelines ug rekisitos alang sa implementasyon sa nasangpit nga proyekto.
Ang umaabot nga CMGP project mao ang rehabilitasyon ug pagkongkreto sa 3.44 kms nga Provincial Road sugod Brgy. Fatima hangtod Brgy. Punta nga adunay pundong P51 milyones.
Kini gikatakdang ma-implementar sa tuig 2019 uban usab sa laing duha ka lungsod nga mao ang Leon B. Postigo ug La Libertad ning lalawigan sa Zamboanga del Norte.
Pagpasabot sa mayor nga dili angayang ikadalo ang yuta alang sa proyekto tungod kay ang mga yutang gihuptan sa katawhan, bisan adunay titulo, iya man gayod sa gobyerno tungod kay matag tuig, magbayad man gayod ug buhis.
Sa maong konsultasyon, gipasabot sa Technical Working Group (TWG) sa kagamhanang probinsiyal nga naglangkob sa mga buhatan sa Provincial Engineering Office (PEO), Provincial Information Center (PIC), Provincial Environmental and Management Office (PEMO) ug Provincial Planning and Development Office (PPDO), nga diha sa pagpalapad sa dalan, mahimong adunay mga balay o istraktura ang pwedeng maguba ug mga kahoy ug lubi ang maputol apan walay compensation nga madawat ang affected persons tungod kay wala kiniy budget. Apan kon ang Local Government Unit (LGU) mohatag ug counterpart, mahimo silang mahatagan ug ayuda.
Nasayran gikan sa survey team sa PEO nga ubay-ubay gayod nga lubi ang maputol sa nasangpit nga road widening apan positibo ang reaksiyon sa mga lumulupyo ug andam silang mo suporta sa proyekto nga gihatag sa gobyerno.
Ang CMGP, usa ka programa nga gitambayayongan sa Department of Budget and Management (DBM) ug Department of the Interior and Local Government (DILG) nga nagtabang sa pagpalambo sa kahimtang sa mga provincial roads pinaagi sa paghatag niini pundo. (PIC -elds)
