Davao City- Mag-atubang og silot nga P5,000 ug makasuhan ang mga mag-tamper, mag-forge ug mangatik nga tag-iya sa bag-ong Food and Medicine Pass sa dakbayan sa Davao subay sa napasar nga ordinansa sa 19th City Council.
Sumala ni Councilor Maria Belen “Mabel” Sunga Acosta, chair sa committee on peace and order sa interbyu sa RMN Davao, lagdaan ni Davao City Mayor Sara Duterte ang napasar nga ordinansa ug maghulat karon og 15 ka adlaw nga ma-publish kini usa hingpit nga ipatuman sa publiko.
“Naay i-deputized si Mayor Sara nga mga tanods, police ug naa puy Task Force kung kinsay pweding mudakop,” segun ni Acosta.
Giabisuhan ang katawhan nga ampingan ang ilahang mga FM Pass.
Kung nawala o nadaot kini kinahanglang isumite sa residente ngadto sa ilahang barangay ang iyahang FM Pass control number aron makakuha kini’g Temporary Barangay Certificate.
Kinahanglan usab nga ma-verify ang Barangay kung buot ilisan ang mga pangalan nga nabutang sa FM pass ug dili pwedi ang unauthorized nga pagpuli sa mga pangalan.
Gibutyag ni Acosta, naka-color coding na ang bag-ong FM Pass per district aron dili kini sayon nga i-fake apan walay nausab sa mga adlaw nga pwedi kining magamit base sa last digits diin ang 1, 3, 5, 7, 9 magamit sa Lunes, Miyerkules ug Biyernes, samtang ang FM Pass nga adunay last digit nga 0, 2, 4, 6, 8 magamit sa Martes, Huwebes ug Sabado gikan alas-4:00 sa buntag kutob alas-9:00 sa gabie.
Sa pagkakaron nagpadayon pa ang coordination sa Vice Mayor’s Office ug mga barangays para sa issuance sa bag-ong FM Pass.
(Aimee Guinita)
