Davao City – Gibana-banaan nga anaa sa 5 milyones ka pesos ang danyos sa nagubang dalan sa Compostela Valley Province resulta sa kusog nga pag-ulan sa milabay nga mga adlaw.
Kini ang gibutyag ni Leslie Francisco, spokesperson sa Office of the Civil Defense (OCD)-XI sa pakighinabi sa DXDC RMN Davao.
Matud pa ni Francisco nga anaa sa 100 meters ang gitas-on sa maong nagubang dalan partikular na sa Brgy. Pasian, Monkayo sa maong probinsya diin padayon karon ang gihimong pag repair sa Department of Public Works and Highways (DPWH) niini.
Hinuon maagi-an na sa mga sakyanan ang portion sa maong karsada samtang padayon karon ang gihimong clearing operation sa DPWH labi na sa mga debris nga resulta sa pagdahili sa yuta.
Gikumpirma usab sa OCD-XI spokesperson nga nakabalik na sa ilang pinuy-anan ang 145 ka pamilya o 516 ka indibidwal sa ComVal partikular na ang taga Brgy. Mt. Diwata ug Brgy. Pasian sa Monkayo ug Brgy. Poblacion sa Nabunturan human sa gipatuman nga preemtive evacuation.
RadyoMaN Kirby Manzon
