Davao City – Mokabat sa P6.7M nga kinartong smuggled nga mga sigarilyo ang nasakmit sa Criminal Investigation Detection Group ( CIDG) Team-Davao sa pito ka mga bodega sa may Door 72-B, Santiago bldg., F. Bangoy St., ug Lapu-lapu St., Agdao, Davao City.
Sa interbyu sa RMN Davao kang CIDG Davao head Police Chief Inspector Milgrace Driz nga malampusong nilang nasikop ang Chinese national nga si Leo Lee Sy.
Sumala ni Driz sobra sa 7,000 ka reams sa nagkadaiyang brands sa sigarilyo o anaa sa P6.7M kantidad ang ilahang nakumpiska.
“Gina-deliver ni gikan sa Manila so most probably ginabarko based on our reports mga Wing vans pa ang naga-deliver diha and nakita namo sa karton motor parts pero ang sa ilalom mga cigarettes. Mao na karon gina-monitor nato for possible apprehensions in the near future,” matud ni Driz.
Magatubang og kasong may paglapas sa RA 8293 o Intellectual Property Code of the Philippines ang naarestong suspek.
Samtang sa laing operasyon sa CIDG arestado ang tulo ka mga indibidwal sa pagpamaligya’g illegal cosmetic items sa may Blk. 7 Lot 6 & 7 Phase1, Talisay St., Deca Homes Subd., Indangan, Davao City.
Pinasikad sa search warrant positibong narekober sa mga operatiba sa CIDG ang anaa sa P5M nga mga produkto.
Matud ni Driz nga wala nakarehistro sa FDA o walay mga papeles ang maong mga nakumpiskang items.
Ang subject sa nasangpit nga operasyon nga si Marvin Rey Marba wala sa maong lugar apan nasikop ang asawa niini nga si
Nelibeth Marba, 30 anyos ug mga kauban sa magtiayon nga sila Charish Malvez ug Kevin Burgos.
Matud ni Driz gina-deliver ang illigal nga mga produkto didto sa Davao del Norte.
Kasong may paglapas sa RA 9711 o Food and Drug Administration Act of 2009 ug
RA 8293 o Intellectual Property Code of the Philippines sa mga nadakpan.
Pasidaan ni Driz sa katawhan nga siguraduhong luwas ang mga ginagamit nga produkto ug rehistrado kini sa FDA kay basin adunay mga kemikal o ingredients nga gihalo nga makadaot sa panlawas.
RadyoMaN Aimee Guinita
