Davao City – Mokabat sa kapin 600,000 pesos ang damyos sa sunog nga miulbo kagahapon bandang alas 11 sa buntag sa Purok 2, Brgy. 76-A ning syudad sa Davao.
Sumala ni FO2 Rogel John Alocelja, fire investigator sa Bangoy Sr. Fire Station, gituohang unattended electrical appliances kun nag overheat nga electric fan ang hinungdan sa sunog ug paspas nga mikanit ang kalayo ngadto sa mga kasikbit nga mga balay hinungdan sa pagkaugdaw sa gibana-banaang 60 ka mga panimalay diin kapin 200 ka mga pamilya ang apektado.
Dugang niini, adunay natalang usa ang samdan nga nakaangkon og first degree burn human napaso ang walang abaga lakip nasunog ang buhok sa biktimang si Darwin Namok, 47 anyos ug nagpuyo sa maong lugar.
Matud sa BFP XI nga gideklarang fire out ang maong sunog alas 4:44 sa hapon diin naglisod matud pa og agi ang mga responders tungod sa kagamay sa agianan sa area.
Sa karon, sa chapel ug sa evacuation center temporaryong nanimuyo ang mga apektadong residente ug gina-evaluate na sa City Social Services and Development Office kun CSSDO aron mahatagan og pinansyal nga tabang.
RadyoMaN Don Pulayao
