Davao City – Gikumpirma sa Department of Social Welfare and Development (DSWD)-XI nga ang tibuok budget sa social pension sa senior citizen sa kantidad nga P6,000 alang sa tibuok tuig ang ilang madawat.
Sa interbyu sa DXDC RMN Davao kang Florame Espada, Information Officer sa DSWD-XI, gibutyag niini nga una nang na-release ang maong budget sa mga benepisyaryo sa Carmen ug Samal ug gilayong isunod ang uban pang probinsya sa musunod nga mga semana.
“For senior citizens, nag start na ta sa Davao del Norte pag distribute. Then, sunod sunod na ni siya. The following week naa na pud tay schedule for other provinces,” saysay ni Espada.
Gipasabot ni Espada nga tibuok budget sa maong pension ang i-release aron dili na magbaton pa og pagkadelatar labi na nga aduna pa usay laing budget ang i-release sa departamento sama sa Pantawid Pamilyang Pilipino Program (4Ps).
“Good news lang pud sa mga senior citizen nato kay instead of P3,000 lang ang madawat kay semestral man gyud unta ang atong pagdistribute. But ang mga areas karon nga atong payout’an, P6,000 na. So for the whole year na ang ihatag sa ilaha,” saysay ni Espada.
Tambag usab sa DSWD-XI Information Officer sa mga benepisyaryo nga maminaw lamang sa anunsyo gikan sa ilang mga Municipal Social Welfare Officers sa eksaktong schedule sa pagdawat sa ilang pension.
RadyoMaN Kirby Manzon
