Davao City – Ipresenta pa unta sa mga operatiba sa Philippine Drug Enforcement Agency (PDEA) Regional Office XI uban ang kapulisan sa Davao del Norte ang search warrant ngadto sa mga targets sa operasyon apan inay malinawong musumite sa balaod nibira sa iyang UZI sub-machine gun ug nagpabuto ang suspek nga si Sammy Salig hinungdan nga napusilan-patay kini sa mga awtoridad didto sa may Purok Tadena, Boundary Barangay Magugpo West, Barangay Mankilam, Tagum City, Davao del Norte.
Arestado usab ang kauban niining si Norodin Canid Kudarat ug narekober sulod sa maong panimalay ang 71 gramos sa shabu nga adunay estimated street value nga P852,477, assorted drug paraphernalias ug gigamit nga armas sa napatay nga suspek.
Sumala ni PDEA XI Regional Director Antonio Rivera atol sa interview sa RMN Davao nga gikonsidera nila ang mga suspek nga mga High Value Targets.
Balhog karon si Kudarat sa detention facility sa PDEA XI ug napasakaan na kini’g kasong may paglapas sa Republic Act 9165 o Comprehensive Dangerous Drugs Act of 2002.
Sa pikas bahin laing duha pa ka mga HVTs ang nadakpan sa PDEA XI didto sa may Quezon Street, Barangay Central, Mati City, Davao Oriental.
Arestado ang Regional Target Number 11 sa PDEA nga si Ben Hadjali Tashim, 44 anyos, residente sa Islamic Center, Barangay Central ug Winjan Rafael Lorenzo, 30 anyos, taga-Barangay Central, Mati City, Davao Oriental human kini namaligya’g P10,000 nga kantidad sa shabu.
Nakuha usab sa posesyon sa suspek ang P24-mil kantidad sa 2 gramos nga shabu.
Kasong may paglapas sa R.A. 9165 ang gipangatubang sa mga suspetsado kinsa priso karon sa Mati City Police Station (MCPO).
RadyoMaN Aimee Guinita
