Davao City- Mukabat sa kapin 83 milion pesos ang natunol na sa City Government of Davao ngadto sa mga indibidwal ug pamilya nga naapektohan sa bagyong Vinta diin pipila ka mga katawhan ang nabahaan ug nawad-an og panimalay.
Atol sa gipahigayong press briefing ganinang buntag sa City Mayor’s Office, miingon si Davao City Mayor Inday Sara Duterte-Carpio nga adunay 20 mil ka mga tawo ang naapektohan sa maong bagyo.
Hinuon gipaniguro sa lokal nga panggamhanan nga natunolan na og assistance ang mga apektadong pamilya og indibidwal pinaagi sa City Social Services and Development Office ngadto sa 25 ka mga barangay sa syudad nga gipailawom sa state of calamity.
Base sa datos, adunay 357 ka mga pamilya nga ang panimalay gikonsiderang totally damage nakadawat na og 10 thousand pesos samtang 333 ka mga pamilya nga ang panimalay gikonsiderang partially damage nakadawat na usab og 5 thousand pesos.
Atol sa Disyembre 22 ngadto 26, nakadawat og kapin usa ka libo ang matag pamilya alang sa food assistance.
Matod sa mayor kung aduna may buot mudonar alang sa mga pamilyang apektado sa bagyo mahimo kining ipadangat sa opisina sa Task Force Davao.
“Centralize ang atoang relief operations, inititally dinhi sa City Hall but since we have to restore normal office work diri sa City Hall we moved it to Task Force Davao. So karon ang relief, repacking and dispatching naa sa Task Force Davao,” segun sa mayor.
RadyoMaN Abi Bibera
