Davao City – Mas engrande ug makunsidera nga pinakadako nga award-giving body sa kinatibuk-ang street dancing competition sa Pilipinas ang Indak-indak sa Kadayawan atol sa kasaulogan sa ika-34th Kadayawan Festival dinhi sa syudad sa Davao.
Atol sa gipahigayon iSpeak Forum, gibutyag ni Kadayawan 2019 Event Organizer Harold Quibete nga mukabat sa P8-M tax-free ang premyo nga ipanghatag sa mga mudaog sa Indak-indak sa Kadayawan.
Saysay ni Quibete nga mas gipadak-an ang P500K nga premyo sa milabay’ng tuig sa mag first place ngadto na sa P1M.
Karong tuiga, dako na ang higayon usab sa mga kaniadto pang contingent nga makadaug human gihati na sa tulo ang street dance partikular ang School-based category, Open category ug Champion’s Circle kung asa magtigi ang mga nakadaug niadtong 2016, 2017 ug 2019 diin makadawat og P1. 2M ang mudaogay.
Gibana-banaang anaa sa 1,833 ka mga partisipante gikan sa 49 ka mga contingents ang gilauman sa Indak-indak organizers diin sa pagkakaron duna nay mga nagpalista alang sa open category nga gikan sa Bislig, Sultan Kudarat, Tacurong, Bukidnon, Maco ug Governor Generoso.
Karong Agosto 2, 2019 opisyal nga paga-ablihan ang 34th Kadayawan Festival samtang sa August 17, 2019 mahinayon ang final showdown sa Indak-indak sa Kadayawan.
RadyoMaN Jason Amisola
