*Cauayan City, Isabela- *Inaayos na ng Sillawit National High School ang mga gamit, pananim at dekorasyon na sinira ng hindi pa nakikilalang mga suspek nitong nakaraang Linggo, Marso 24, 2019 sa nasabing eskwelahan.
Sa panayam ng 98.5 RMN Cauayan kay Brgy. Kagawad Romualdo Cuagdan ng Sillawit, alas otso ng umaga noong Linggo nang makita ang mga sira-sirang pananim, dekorasyon at mga gamit sa paaralan na winasak ng mga suspek.
Tumambad rin ang putol na flag pole na sapilitang sinira ng mga suspek.
Kaugnay nito, mayroon nang dalawang persons of interest ang binabantayan ngayon ng mga Brgy. Officials katuwang ang PNP Cauayan City na pangunahing suspek sa naturang paninira.
Malaki anya ang posibilidad na mga lasing at hindi kabataan ang may kagagawan sa pagwasak sa mga gamit at pananim ng naturang paaralan.
Dahil dito, magsasagawa na ng pagpapatrolya sa gabi ang mga opisyal ng nasabing barangay upang hindi na maulit ang pambababoy sa paaralan.
