Maayon, Capiz- Ginbuksan na ang gate sang Salgan Elementary School sa banwa sang Maayon.
Ini matapos ginpadulongan sang news team ang nasambitan nga eskwelahan bangud sa report nga gin-padlock ang gate rason nga wala makapatigayon sang kick-off ceremony sa Brigada Eskwela kahapon nga adlaw.
Makit-an nga nabilin na lamang ang kadena subong man ang kandado.
Base sa blotter report, nagpadulong sa Maayon PNP ang principal sang amo nga boluthoan nga si Mr. Paulino Dumagpi kag mga manunudlo nga sanday Rosalie Celeste kag Julie Dellava agud nga ipa-rekord nga sang nakaligad nga Mayo 25, 2018 nadiskubrehan na lamang nga ginsarado sang nagaklamar nga si Constancia Dignomo ang duha ka gate sang amo nga eskwelahan.
Sang ginpadulongan sang principal si Dignomo, ginkumpirmar man sini nga siya ang nag-padlock sa gate bangod nga nagapati ini nga ang porsiyon sang duta nga ginatindogan sang boluthoan ang kabahin sang iya lote.
Gindugang pa sini nga buksan lamang niya ang amo nga boluthoan kun baklon sang DepEd ang amo nga duta.
Gilayon nila nga ginpalab-ot ang amo problema sa pamunoan ni Capiz DepEd Division Superentindent Dr. Miguel Mac Aposin.
Matapos ang sinapol sa tunga sang pila ka mga opisyal kag legal department sang DepEd, sa ulihi nagpasugot naman si Constancia Dignomo nga ihatag ang liyabe kag buksan ang gate sang eskwelahan.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
