Pag-ambush sa mga pulis sa Guihulngan ginplano suno sa Army

871

GUIHULNGAN, NEGROS ORIENTAL – Ginpahayag sang Philippine Army nga gin-planuhan sang rebelding grupo ang pag-ambush sa mga katapo sang Guihulngan Police Station sang Biyernes sang aga, Hulyo 21.

Suno kay 79th IB Commander – Lieutenant Colonel Roderick Garcia nga ang natabu sa kapulisan sang Guihulngan City ang isa ka planned attack sang mga katapo sang NPA.


Dugang pa ni Garcia nga nagtingub ang pwersa sang Central Negros Front kag Regional Strike Force sang NPA agud atakehon ang mga katapo sang kapulisan.

Padayon sa karon ang operations sang Philippine Army batok sa gina-siling 60 ka mga katapo sang rebelding hubon.

Sa pihak nga bahin, gin-confirm ni PNP-NIR-Regional Director – Chief Supt. Edmund Gonzales nga nakuha man sang mga katapo sang gina-suspetsahan NPA ang anum ka mga high powered fire-arms kag anum pa armas sang Guihulngan City Police Station.

Ginpahayag ni Gonzales nga prone sa ambush ang Sitio Mandi-e, Brgy. Magsaysay bangud nga takladon ang dalan sa amo nga lugar sa diin mahapos naman nga makapana-og ang mga rebelde.



Napatay sa amo nga ambush ang hepe sang Guihulngan PNP nga si Supt. Arnel Arpon lakip na sanday PO2 Alfredo Dunque, PO2 Alvin Bulandres, PO3 Teovic Agusto, SPO2 Nicasio Tabilon, kag SPO1 Jesael Ancheta kag ang sibilyan nga si Michael Jambalos.


Samtang, stable naman sa karon ang kondisyon sang mga napilasan nga pulis lakip sanday SPO4 Jerome Delara, PO3 Jordan Balderas kag PO2 Jorie Maribao sa Dumaguete City hospital.

Nahibaluan nga ang Guihulngan City ang ginakabig nga hot bed sang mga rebelde bangud sa mabaskug naman nga suporta sang residente.

Suno kay acting Negros Oriental – provincial director – Sr. Supt. Henry Biñas, nga mabudlay ang paglagas sa mga katapo sang NPA bangud nga ini sila ang suportado man sang publiko sa amo lugar.

Sa pihak nga bahin, personal naman nga magapadulong sa ambush site sa Guihulngan City agud magpatigayon sang imbestigasyon si Commission on Human Rights Investigator Dr. Jess Cañete sa diin ginakabig ini sang CHR bilang isa ka massacre.

Kahapon, ginpangunahan man ni PRO-18 Regional Director PCSupt. Edmund Gonzales ang paghatag sang Wounded Personnel Medal sa tatlo ka mga pilason nga pulis sa ambush nga natabo kahapon sa Barangay Magsaysay, Guihulngan City, Negros Oriental.

Ini amu sanday Senior Police Officer 4 Jerome Delara, Police Officer 3 Jordan Balderas kag Police Officer 2 Jorie Maribao.

Facebook Comments