Ihatag nalang ngadto sa mga security sectors ang pag-assess kung angayan pa bang ipadayon o dili ang gipatumang Martial Law sa Mindanao, matud pa sa usa ka pari nga nahimong bihag sa mga teroristang grupo atol sa nahitabong giyera sa Marawi City.
Kini human migawas ang proposal nga lugwayan na usab og laing usa ka tuig ang Martial Law nga unang gipatuman dihang nahitabo ang Marawi siege niadtong Mayo 23, 2017 tungod sa pag-atake sa Dawlah Islamiya.
Matud pa ni Fr. Teresito “Chito” Soganub, ang vicar general sa St. Mary’s Cathedral sa Marawi City, kinsa gibihag sulod sa 117 ka adlaw aron himoong taming sa mga terorista batok sa militar, nga dili siya pabor, apan dili usab siya supak sa maong extension.
Apan tungod sa dayag nga hulga sa seguridad tungod sa mga gitahong mga suicide bombers, angayan usab nga pahugtan ang seguridad, ug ihatag kini ngadto sa mga eksperto nga maoy mo-desisyon sa angayang buhaton o ipatuman.
Niadtong bulan sa Hunyo, duha ka pagbusikad ang dungan nga nahitabo sa Lamitan, Basilan, gawas mismo sa usa ka Army detachment. Patay ang duha ka mga gitouhang suicide bombers, lakip na ang tulo ka mga sundalo ug duha ka sibilyan.
Sa nahitabong pagbusikad sa Jolo Cathedral sa Sulu niadtong Enero, gisuta pa sa militar kung aduna usab kini kalabutan sa suicide bombing.
Miingon si Soganub nga mahimo lamang, matud pa, supakon sa publiko ang Martial Law extension kung adunay makit-ang dayag nga mga paglapas sa tawhanong katungod nga gihimo sa mga anaa sa katungdanan.
Kung kahinumduman nga pipila ka semana sa wala pa matapos ang 2017, nagpasa og balaod ang kongreso nga lugwayan kini og usa ka tuig sa 2018. Apan sa wala pa matapos ang 2018, gi-amyendahan ang balaod nga lugwayan na usab kini sa tibook tuig sa 2019.
