Kini ang gisaysay ni Mary Grace Montecillo nga taga Agdao ning syudad, usa sa mga misaksi sa subling pag-abri sa Kadayawan Tribal Village, August 5, 2022, sa Magsaysay Park, Davao City subay sa 37th Kadayawan sa Davao.
Na-enjoy usab kini uban ang iyang mga higala sa paglibot-suroy sa mga gitukod nga villages sa 11 ka mga tribu sa dakbayan nga mao ang Ata, Bagobo-Klata, Bagobo- Tagabawa, Matigsalug, Obu-Manuvu, Kagan, Iranun, Maguindanaon, Maranao, Sama, ug Taosug.
“Lingaw, daghan og improvement bisan daghan og nahitabo sa milabay’ng tuig,” saysay ni Mary Grace.
Ubay-ubay ka mga Dabawenyos ug mga bisita ang misaksi sa subling pag-abri sa Kadayawan Tribal Village diin duha usab ka tuig nga wala kini nasuroyan tungod sa pandemya busa makita sa mga misaksi ang paghinam-hinam nga makabisita sa usa sa highlights sa Kadayawan.
Samtang, gipangunahan ni Davao City Mayor Sebastian ‘Baste’ Duterte ang maong opening ceremony diin gi-usa-usa niini’g libot ug bisita ang matag village sa 11 ka mga tribu.
Gawas sa mismong gitukod nga village, gipasundayag usab sa Lumad ug Moro tribes ang ilang mga sayaw, tugtog, mga traditional attire, ug mga pagkaon.
Ang maong village gitukod sa City Government of Davao niadtong 2017 isip pamaagi nga ma-edukar ang katawhan ingon man ilang maobserbahan ang kultura sa 11 ka mga tribu nga nanimuyo sa dakbayan sa Davao.
RadyoMaN Renz Barbarona
