![WEBSITE-18-×-10-in-31.jpg](https://i0.wp.com/rmn.ph/wp-content/uploads/2023/06/WEBSITE-18-×-10-in-31.jpg?resize=696%2C387&ssl=1)
Kagahapon adlawa, gilunsad sa Pag-IBIG FUND ang Asenso Riders Raffle Promo nga gitambongan sa gatusan ka mga food riders nga gilangkuban sa Food Panda, Grab, Maxim ug uban pang riders organization nga gipahigayon sa activity center sa Abreeza Mall ning syudad.
Matud ni Pag-IBIG FUND Chief Executive Officer Marilene Acosta nga ilang gisugdan ang Asenso Riders Raffle Promo sa Metro Manila, Visayas ug katapusan dinhi sa dakbayan kagahapon adlawa.
Segun ni Acosta, buot sa ilang buhatan nga matabangan ang mga anaa sa industriya sa riders services nga makatigom ug maka-avail sa housing loan aron ang ilang pamilya ma’y kaugalingon nang pinuy-anan ug dili na mag-abang pa samtang magbaton og savings alang sa kaugmaon sa ilang mga pamilya.
Ug tungod walay employer ang mga riders, ipaagi sa voluntary ang ilang pagpamiembro sa Pag-IBIG Fund nga dunay kontribusyon nga magsugod sa P100 ug pataas matag buwan kansang mga rider nga interesado mamahimong mag-apply pinaagi sa online o dili ba kaha sa mismong Pag-IBIG Fund office.
Sa nahimong mensahe ni Mayor Sebastian “Baste” Duterte nga gibasa ni 3rd District Councilor Myrna Dalodo Ortiz, gidasig niini ang tanang riders nga magpa-miembro sa Pag-IBIG Fund diin suportado sa mga opisyal sa Food Panda ug Grab ang Asenso Riders Raffle Promo.
Sa katapusan, perting dagkoa og ngisi ang mga riders nga nakadaog sa raffle draw ug nanguli sila nga nakabitibit og helmet, cellphone, P1000 voucher, P20,000 cash, ug duna sa’y napulo ka mga motor ang ipang-raffle sunod buwan.
RadyoMaN Joel Viray