SYUDAD sang Iloilo – Gintambungan sang mga mataas nga opisyal sang simbahan Romano Katoliko ang Episcopal Ordination ni Most Rev. Most Rev. Midyphil B. Billones, D.D, ang Auxiliary Bishop-elect sang Archdiocese of Cebu.
Ginhiwat ang solemn mass sa Jaro Metropolitan Cathedral.
Ang Principal consecrator sa ordinasyon amo si Most Rev. Jose Romeo Lazo, D.D., ang Arsobispo sang Jaro kag paga asisteran nanday Most Rev. Jose Palma, D.D. ang Arsobispo sang Cebu kag Most Rev. Angel Lagdameo, D.D. ang Arsobispo-emerito sang Jaro.
Samtang si Most Rev. Luis Antonio Cardinal Tagle, D.D.- Arsobispo sang Manila ang naghatag sang homiliya.
Nagkonselebrar man sa selebrasyon si Most Rev. Gabrielle Giordano Caccia, D.D., ang Papal Nuncio sang Vatican kag iban pa nga mga arsobispo, obispo kag mga kaparian sang Pilipinas.
Bilang auxillary bishop, siya ang maga asister sa kay Cebu archbishop Jose S. Palma, isa man ka Ilonggo, sa pagpadalagan sang pinakadako nga archdiocese sa Asya nga may pinakadamo nga mga Katoliko, pari, relihiyoso, kag mga seminaryo.
Ang appointment ni Billones ang gin-anunsyar sang Vatican matapos nga ginsaylo ang anay auxillary bishop sang Cebu nga si bishop Dennis Villarojo bilang Obispo sang Malolos, Bulacan.
Si Billones, tumandok sang probinsya sang Capiz, ang gin-ordinahan sa pagka-pari sadtong Oktubre 2, 1995. Siya ang nag eskwela sang Philosophy sa St. Vincent Ferrer Seminary sa siyudad sang Iloilo, Theology kag Masters in Theology sa Loyola School sang Ateneo de Manila, kag Doctorate in Theology sa Pontifical Gregorian University sa Roma.
Nangin Assistant Priest ini sa Jaro Cathedral kag Personal Secretary ni the late Archbishop Alberto Piamonte kag ni Archbishop-emeritus Angel Lagdameo.
Nangin miyembro man ini sang Presbyteral council, Vice-chancellor sang Commission for Youth kag Commission on Laity sang Archdiocese of Jaro. Sa karon, siya ang rektor sang St. Joseph Regional Seminary.
