Davao City – Dako gihapon ang kalipay sa pamilya ni Carlo Paalam, 23 anyos sa pag-uli niini og silver medal sa Men’s Flyweight 52 kg boxing batok kang Galal Yafai sa Great Britain niadtong Sabado (Agosto 7, 2021) sa 2020 Tokyo Olympics.
Sa interbyu sa DXDC RMN Davao kang Pio Reo Paalam, amahan ni Carlo, gipasalamat niini sa Ginoo ang naabot sa anak diin dako na ang oportunidad ang pagrepresenta niini sa Pilipinas sa Olympics ug taas pa usab ang maabot niini tungod kay 23 anyos pa lamang.
“Laban pa ‘ta! Kay naa pa may daghang blessings nga muabot ani kay 23-anyos pa man ni (si Carlo). Gipakita man gyud sa atong pambato, sa akong anak nga siya andam unta nga iyang kuhaon (ang gold medal) apan wala pa gihatag sa Ginoo sa iyaha. Pero at least, nga nakahawid gyud ‘ta og silver medal pinaagi sa 23-anyos sa 2020 Tokyo Olympics,” sulti sa amahan.
Samtang, dako usab ang pagpasalamat ni Jocelyn, inahan ni Carlo sa tanang nagsuporta sa anak diin dako na usab nga kalampusan ang pag-abot niini sa finals sa Olympics.
“Nagpasalamat ko sa tanang nagmahal sa iyaha (Carlo), mga supporters, ug sa iyang coach nga maoy nagabay kanunay kaniya ug labaw sa tanan kang Jesus Christ nga bisan pa man og silver (medal) lang pero para namo winner siya tungod kay gihatag niya iyang tanang kakayahan sa iyang away. Wala pa gihatag ni Lord ang iyang gold (medal) basin sa sunod, bata pa man kaayo siya, 23 years old,” saysay sa inahan.
Base sa August 7, 2021, anaa na sa P20 million ang gihatag nga cash incentives kang Paalam, gawas pa sa ubang rewards sama house and lot, big bike ug lifetime flights / unli flights gikan sa mga dagkong airline companies sa Pilipinas.
RadyoMaN Kirby Manzon
